Amasyalıdır. Çelebizâde Mustafa Ağa bin Hüseyin bin Ali’nin mahdûmudur. Iydîzâde el-Hâc Akif Mustafa Akdağî eş-Şeyh Mustafa, Çorumlu Müftü es-Seyyid el-Hâc Ali, Taşâbadi el-Hâc Ahmed Efendilerden ulûm-ı akliyye ve nakliyyeyi ahz ve istifâza ederek ders-i âm-ı meşhûr oldu.
Yıllarca tedrîs-i ulûm ederek fazilet-i ilmiyesini bütün ulemâ-yı be-nâma tâsdik etdirdi. 1179’da üstâd-ı meşhûr Laz İbrâhim Efendi’nin irtihâlinde Saraçhâne Câmii ittisâlinde el-Hâc Mustafa Ağa’nın binâ etdiği medrese müderrisi olarak fevkalâde iştihâr etdi. [130] Üstâzı es-Seyyid el-Hâc Ali Efendi ile gâyet müşkil-pesend olan Seküköylüzâde el-Hâc Kâşif Mehmed Efendi’nin zaman-ı iftâlarında müsevvid ve emînü’l-fetvâ ve şeyhü’l-muhaddisîn Seküköylüzâde el-Hâc Osmân Efendi’nin 1189’da vefâtına binâen Tamgacı Ahmed Ağa’nın Sultân Bâyezîd Câmi-i şerîfinde vaz’ eylediği dersiyye-i hadîs-i şerîfe mutasarrıf oldu.
Evâhir-i hayatında ömrünü tefsîr ve hadîs tedrîsine hasr ederek mükerreren icâzet verdi. Beydâvî Tefsîrini ve Sahîh-i Buharî ve Müslimi hatm ederek imrâr-ı hayat etmekde iken 1191 senesi rebîülevvelinde ulemâ ve a’yânın ısrârına binâen Amasya müftüsü olup 1192 senesi receb-i şerîfinin evâilinde dâr-ı naîme irtihâl etdi.
Gâyet fâzıl, muhakkik, ulûm-ı akliyyede yegâne-i asr olup, gâyet müteşerri’, âbid, müfessir, muhaddis, meşâhîr-i fukahâdan olduğu Iydîzâde es-Seyyid Abdürrahim Efendi “Kitâbü’l-mecmu’ ‘ani’l-meşhûd ve’l-mesmû’”unda yazıyor. Ürgüblü el-Hâc Ahmed Efendi’nin şöhret-i ilmîyesi bunun irtihâlinden sonra başlar. Mahdûmu el-Hâc Hâfız Mustafa Efendi’dir. [131]