Amasya eşrâfından ve kudâttan Dâniş Mehmed Efendi bin Kudbeddîn Mustafa Efendi’nin oğludur. Ulemâdan tahsîl-i ulûm edib ba’zı kasabâta kadı ve mukâta’at mültezimi ve hâciyân a’zâsı olarak teayyün etdi. 1142 muharreminde Hacıbaşı olup zamân-ı riyâsetinde vak’a-i fecî’a zuhûr eylediğinden esnâ-yı vak’ada vefât etdi.
Meşâhîr-i a’yândan müteneffiz, hânedân, müteharrik bir zât idi. Oğulları İbrâhim, Halîl Ağalar’dır. Bu İbrâhim Ağa’ya “Fenerci” dendiğinden evlâdına “Fenercioğulları” ve Halîl Ağa da “molla” demekle meşhûr olduğundan evlâdına “Molla Halîl Oğulları” dendi. Fenercizâdeler meşâhîr-i ulemâdandır.