Amasya havâlîsinde Mecidözü kazâsı nevâhîsinden Elvân Çelebi nâhiyesinden Elvân Çelebi vakfı mütevellîsi Mustafa bin Mahmûd Ağa’nın mahdûmudur. Sadr-ı esbak Yûsuf Ziyâ Paşa’nın dîvân kâtibi olan Halîl Recâî Efendi’nin [19] sevk u ta’rîfi sâyesinde paşa-yı müşârün-ileyhin dâ’iresine intisâb edib efendisi 1213’de sadr-ı a’zam oldukta mâliye kalemine yerleşdi.
Tedrîcen tefeyyüz ederek mâlikâne ser-halîfesi olup 1223 senesi leyle-i Kadirinde Sadr-ı a’zam Alemdâr Mustafa Paşa’nın şehîden vefâtında firâr u ihtifâ eden defterdâr-ı şıkk-ı evvel Mehmed Tahsîn Efendi mu’ahharan âsî yeniçerilerin elinde maktûlen vefât eylediğinden ma’zûl u muhtefî olup bir müddet sonra Sadr-ı a’zam Yûsuf Ziyâ Paşa’nın himmetiyle eski mevki’ine geldi.
1226 senesi rebîülâhirinde sadr-ı müşârün-ileyhin azl ü nefyi üzerine mensûblarının da azl ü nefyi esnâsında sene-i mezbûre cumâdelûlâsında bu da azledilip Amasya’ya ve buradan da vatanı olan Elvân nâhiyesine nefyedildi. Ba’dehû orada Elvân Çelebi vakfı mütevellîsi olup 1248’de vefât etdi. Elvân Çelebi câmii hazîresinde medfûndur. Mahdûmu Mustafa Efendi de mütevellî olup 1275’de vefât etdi. [20]