Amasyalıdır. Mehmed Çelebi kerîmesi olup Molla Cürcân demekle meşhûr olan Muhyiddîn Mehmed Efendi 955 senesi cumâdelûlâsında Amasya müftüsü olup geldikte bununla te’ehhül etdi. Hâtunîye Mahallesi’nde kâ’in hânesinde ikâmet etdi.
965 senesi evâhirinde Amasya vâlîsi Şehzâde Sultân Bâyezîd tarafından zevci Molla Muhyiddîn Efendi İcâdî Hayreddîn Efendiyle İstanbul’a kerhen i’zâm edilip Sultân Süleyman-ı Kânûnî nezdinde icrâ-i sefâret etdiklerinden dolayı Yedikule’de habs ve tevkîf edildiği esnâda vâsi’ ve muhteşem olan hânesini Amasya müftülerine vakf edib sonra vefât etdi.
Şâ’irât-ı nisâdan, gâyet afîf, edîb dânişli bir kadın olduğundan Amasya vâlîsi Şehzâde Sultân [17] Mustafa musâhibelerinden olup zevc-i evveli ümerâdan idi. Mezkûr hâne Iydîzâde el-Hâc Mustafa Âkif Efendi’ye müftülüğünde intikâl edib sonra bunun ahfâdından Ürgübîzâde el-Hâc Ahmed Necîb Efendi’ye ve bundan sonra da Çaycızâdelere mülkiyetle intikâl etdi.