Amasyalıdır. Nakîbü’l-eşrâf kâ’im-makâmı es-Seyyid el-Hâc Zeynelâbidin Ağa’nın mahdûmu olup Çelebizâde Fâzıl Hüseyin Efendi’nin halka-i tedrîsinde ikmâl-i tahsîl edib Köse Hattât es-Seyyid Mehmed Emîn Efendi’den de hüsn-i hatt öğrendi.
Cânikli el-Hâc Ali Paşa’ya intisâb ederek Amasya mukâta’âtı kâtibi olarak hayli nüfûz ve servet edindi. 1193’de Hacı Ali Paşa’nın Rusya’ya firârında ma’zûl u müte’essir olup oldukça tazyîkâta uğradı. 1195 şa’bânında Hacı Ali Paşa’nın avdetiyle ikbâle erdi. [7]
Ba’dehû İstanbul’a gidip tarîk imtihânında muvaffak olduğundan silk-i kudâta girdi. Kasabât u bilâda kadı olduğu hâlde 1221 hudûdunda vefât etdi. Ulemâ ve şu’arâdan idi. Mahdûmu es-Seyyid Ali Vasfî Efendi’dir.