Hâcıköylüdür. Oranın meşâyih ü eşrâfından eş-Şeyh Yahyâ Efendi bin Kızıklı el-Hâc Ahmed Efendi’nin mahdûmudur. Amasya’da tahsîl-i ilm ü ma’rifet ve pederinden ahz-ı tarîkat edib pederinin vefâtında yaptırdığı Kâdirî-hâne şeyhi ve kazâda meclis-i idâre a’zâsı oldu.
Birâderleri Hacı Mahmûd Kâmil ve Mehmed Muhyiddîn Efendilerle müştereken bir câmi-i şerîf binâ ve mülklerini vakf etdi. Yıllarca zikr ü ibâdet, va’z ü tâ’atle iştigâl edib 1297 sâlinde vefât etdi. Nüfûz u serveti ilm ü ma’rifeti derece-i kifâyede olup hânedân, ehl-i hayr bir şeyh-i Kâdirî idi.