Köprülüdür. Ulemâdan es-Seyyid el-Hâc Hüseyin Efendi bin el-Hâc Ahmed Efendi bin müftü el-Hâc Osmân Efendi’nin mahdûmudur. 1165’de doğdu. Çelebizâde es-Seyyid el-Hâc Abdullah ve Amasya’da Ürgüblü el-Hâc Ahmed Efendilerden tahsîl-i ulûm etdi.
Sonra İstanbul’a ve ba’dehû Hicâz’a gidip Mekke-i Mükerreme’de bir yıl mücâveretle eş-Şeyh Ahmed es-Sindî’den ilm-i hadîs ü tefsîr gördü. Buradan Mısır’a gidip kâmûs şârihi es-Seyyid Murtaza Efendi’den ulûm-ı edebiyye ve şer’iyyeyi ahz ve ikmâl-i tahsîl ederek 1195’de Köprü’ye avdet etdi.
Orada tedrîs-i ulûma başlayıp fevka’l-âde iştihâr etdi. Talebe-i ulûm Köprü’ye akın edib [139] Köprü medreselerini doldurdu. 1214’de şehîd müftü el-Hâc Mustafa Efendi’nin medresesi müderrisi ve zâviye şeyhi ve mükerreren Köprü müftüsü olduğu hâlde 1240 senesi cumâdelûlâsının ondokuzuncu günü dâr-ı na’îme irtihâl etdi. Dedebaşı Mezârlığında türbe-i mahsûsasında medfûndur.
Âlim, fâzıl, tefsîr ü hadîsde mâhir, fakîh, usûlî, tevârih ü muhâzarâta âşinâ fuhûl-i ulemâdan, kibâr-ı Nakşibendiyyeden bir zât-ı sütûde-simât idi. Mahdûmları es-Seyyid Mu’îneddîn Mehmed Muğîseddîn Hüseyin, Şerîf Mehmed Efendilerdir.
Es-Seyyid Mu’în Efendi, kibâr-ı kudâtdan ve mevâlî-i devriyyeden olup bunun mahdûmu es-Seyyid Osmân Nûrî Efendi Köprü eşrâfından ve meclis-i idâre a’zâsından olduğu hâlde 1318’de vefât etdi. Cedd ü pederinin terâcim-i ahvâlini bildiren bu zât-ı muhteremdir.