Hacı Baba Ahmed bin Mehmed Hüsrev Şâhî mahdûmu ve eş-Şeyh Hamîdeddîn Abdulhamid Hüsrev Şâhî birâderidir. Hacı Şâdgeldi Paşa’nın evâhir-i ahd-i hükûmetinde Amasya’ya gelip ticâretle iştigâl ederek servet ü yesâre erdi. Hâcegân-ı memleketten oldu.
Çelebi Sultân Mehmed’e mu’âvenet-i mâliyede bulunarak müşârün-ileyhin teveccühâtını kazandı. Zamânında beytü’l-mâl emîni olup Sultân Murâd-ı Sânî’nin Amasya vâlîliğinde ümenâsından olduğu hâlde 835 hudûdunda vefât [48] etdi.
Meşâhîr-i hâcegân ve a’yân-ı Amasîyye’den hânedân, kerîm idi. Mahdûmu Mahmûd Çelebi’dir. Bunun mahdûmları Hâce Musliheddîn Mustafa, Şemseddîn Ahmed Çelebiler’dir. Hâce Musliheddîn Çelebi, süferâ-yı Osmâniyye’den “Uzun Mustafa Çelebi” demekle meşhûrdur. Amasya’da mescid ve mahallesi ve çeşmesi vardır.
Bunun mahdûmu Muhyiddîn Mehmed Çelebi ulemâdandır. Şemseddîn Ahmed Çelebi de hâcegândan olup mahdûmu İbrâhim Çelebi’dir. Bunun mahdûmu defterdâr-ı meşhûr Rüstem Çelebi’dir.