Amasya müftüsü Hâfız Abdurrahman Kâmil Efendi bin Ahmed Rif’at Efendi bin Mecdî Mustafa Efendi’nin mahdûmudur. 1303 senesinde Gümüşlüzâde Mahallesi’nde doğdu. İbtidâî ve İdâdî mekteblerde okuyup şehâdetnâmeler aldıkdan sonra Bekir Paşa müderrisi olan pederinden ikmâl-i tahsîl edib 1326 rebîülevvelinde icâzetnâme aldı. Bu esnâda Köprülü Fâzıl Arif ve Kapancızâde Hâfız Şerîf Mehmed Efendilerden [266] de istifâde etdi.
1327’de bi’l-imtihân ders-i âmlık ehliyetnâmesi alıp tedrîs-i ulûma başladı. “Akaid-i Nesefîyye Şerhi”ni tedrîs ederken Tevhîd-i Tedrîsât Kanûnu ile medrese tahsîli hitâma erdiğinden 1331’de Amasya Lisesi’nde Arabî muallimi, 1336’da dârü’l-hilâfe müderrisi, 1338’de İmâm ve Hatîb Mektebi Edebiyât muallimi ve bunun ilgâsında Bâyezîd Medresesi’nde tevhîd edilen kütübhâneler me’mûru oldu.
Ulûm-ı Arabiyye ve Edebiyye’de mâhir, âlim, pederi gibi kâmil, usûl ve fürûa vâkıf, gâyet zekî, târih ve muhâzarâta âşinâ, tab’an edîb, şâir olup kitâplar mütâlaasından lezzet almış çalışkan bir zâtdır. Şu gazelini bana lutfetmişdir:
Zevk-i dilimi cilve-i hûbâna değişmem
Gönlüm gülünü gonce-i handâna değişmem
Hem-bezm olalı mektebe de böyle kitâpla
Bu kûşeyi ben taht-ı Süleymana değişmem
Cânâ bana dîdâr-ı safâsını haber ver
Çünkü ben anı Ravza-i Rıdvâna değişmem
Binlerce bahâr ile hazân gelse de geçse [267]
Tenhâlığı ben seyr-i gülistâna değişmem
Âyîne gibi sâf olan nazmımı Sabri
Rengîne-i mecmûa-i yârâna değişmem