Nahcivânlıdır. Abdullah oğlu olup tahsîl-i ma’ârif ederek Amasya’ya geldi. Emîr-i kebîr Musliheddîn Kutlu Şâh’a intisâb edib umûr-ı mâliyesinde istihdâm edildi. Fahreddîn Mehmed Cevherî’nin irtihâlinden sonra Hacı Şâdgeldi Paşa’ya defterdâr oldu.
İçerişehrin cihet-i garbiyyesinde meydan kapısının iç tarafında ikâmet etdiği mahalle Ahî Sa’deddîn Mahallesi dendi. Hacı Şâdgeldi Paşa’nın umûr-ı mâliyesini ıslâha bezl-i makdûr edib 780 senesi şevvâlinde vefât etdi. Zâviyesi hazîresinde medfûndur.
Ehl-i ma’ârif, umûr-ı mâliyede mâhir, muhâsib, hayr ü hasenât sâhibi bir racül-i devlet idi. Mahallesinde bir zâviye ve ittisâlinde bir çeşme yapdırıp emlâkini hayrâtının mesâlihine vakf etdi. Mahdûmları Fethullah, Feyzullah Çelebilerdir. Evlâdı evkâfına mütevellî olmuşlardır.