Amasya’nın Eslem Mahallesi imâmı Ömer Efendi bin Merzifonî Ebûbekir Efendi’nin mahdûmudur. 1246’da mahalle-i mezbûrede doğdu. Mehmed Paşa müderrisi Mörekli Hasan, Şehzâde Sultân Osmân Türbedârı Hacı Abdullah oğlu Mustafa Efendilerden ikmâl-i tahsîl edib Hasan Efendi’den mücâz u ders-i âm oldu.
1281’de Köprü ve 1288’de Ünye kazâlarında açılan ibtidâ’î mekteblerine mu’allim olup 1296’da isti’fâ ederek Amasya’ya avdet etdi. 1298’de Köprü sandık emîni, 1299’da Gümüş ibtidâ’î mektebi mu’allimi oldu.
1300’de Amasya’da küşâd edilen Yâkûtiyye mekteb-i ibtidâ’iyyesine mu’allim olup geldi. Bu târîhten i’tibâren sânîyen ders-i âm olup Alçakköprü başında kâ’in Hacı Osmân Bey Câmi-i şerîfinde tedrîs-i ulûma devâm edib 1307’de talebesine icâzet verdi.
1318 senesi ramazânında münhal olan Amasya müftülüğüne ta’yîni husûsuna tilmîzi olan evkâf kâtibi Hacı Kadîrzâde el-Hâc Mehmed Nûrî Efendi bezl-i makdûr etdiği esnâda zilka’desinin ikinci cumartesi günü dâr-ı bekâya irtihâl etdi. [502]
Elsine-i selâsede âlim, fünûn-ı cedîdeye vâkıf, kavâ’id-i Arabiyye ve edebiyyede mâhir, tefsîr u tasavvufa mâ’il, muhibb-i sûfiyye, ta’bîr u beyânı güzel, küşâde-meşreb, tevârih u muhâzarâta âşina, hikâyât u ıstılâhat-ı sûfiyye naklinden mütelezziz, halûk, uzun boylu, nahîfü’l-beden, güler yüzlü, tatlı sözlü, gözlüklü, kerîmü’t-tab’ idi.
Hülâsa meşâhîr-i ulemâdan olup tefsîr-i cüz’-i şerîf-i Nebe’ dersinden istifâde etmişdim. Nehâfet-i bedeniyyesinden dolayı çocuklar arasında “Tahta Seyyid Efendi” denirdi. Hazret-i Pîr İlyâs civârında medfûndur. Mahdûmu el-Hâc Ömer Nazîf Efendi de ulemâ ve şu’arâdandır. Bunun oğulları Mehmed Kâzım, Ahmed Şükrü Efendilerdir.