Amasyalıdır. Mehmed Paşa Mahallesi eşrâfından esbak nakîbü’l-eşrâf kâ’im-makâmı es-Seyyid el-Hâc Ali Ağa bin es-Seyyid Şîrîn Mehmed Ağa bin Ali Ağa’nın mahdûmudur. Gençliğinde dârü’s-sa’âde Ağası Dördüncü Beşîr Ağa’nın himmetiyle enderûna girip ta’lîm u terbiyye gördü.
Ba’dehû dârü’s-sa’âde ağalığı kaleminde hâsekî olup sonra Moldovanî Ali Paşa’ya intisâb ederek sadâretinde selâm ağası ve 1186’da hazînedâr Şâhin Ali Paşa’nın dâ’iresine girip harem kethüdâsı ve mahdûmu Atâullah Paşa’nın gençliğinde lalası oldu. [499]
Yıllarca Paşa-yı müşârün-ileyhin dâ’iresinde kethüdâ olup 1199 senesi cumâdelûlâsının yirminci günü Şâhin Ali Paşa sadr-ı a’zam oldukta dergâh-ı âlî kapıcıbaşılığıyla kapıcılar kethüdâsı oldu. 1200 senesi rebîülevvelinde efendisinin sadâretten azli ve 1201’de Bozca Ada’ya i’zâmı üzerine açıkta kaldı.
1203’de Defterdâr Amasyalı İsmâ’îl Efendi’nin tavsiyesiyle Anadolu vâlîsi vezîr es-Seyyid Ali Paşa’nın kethüdâsı olup 1208 senesi şevvâlinde müşârün-ileyhin arz u inhâsıyla bâ-rütbe-i mîr-i mîrânî Karahisâr-ı sâhib ve 1210 senesi şevvâlinde Sultânönü sancâkları mutasarrıfı oldu.
1212 senesi şevvâlinde Hânya muhâfızı olarak Girit Adasına gitdi. Ba’dehû Resmo sancâğı mutasarrıfı ve kalesi muhâfızı olup 1219 senesi şevvâlinde Rûmeli Beylerbeyiliği pâyesiyle sânîyen Hânya muhâfızı, 1221’de Karahisâr-ı sâhib mutasarrıfı ve 1223’de Midilli ve 1224 senesi rebîülevvelinde sâlisen Hânya sancâğı mutasarrıfı ve kalesi muhâfızı olduğu hâlde 1225 senesi evâ’ilinde orada vefât etdi. [500]
Hâdim-i dîn ü devlet, müdebbir, hüsn-i idâre sâhibi idi. Mahdûmları es-Seyyid Ali, Abdullah Beylerdir. Es-Seyyid Abdullah Beyzâde es-Seyyid Mehmed, Osmân Beyler ve es-Seyyid Ali Beyzâde es-Seyyid Nu’mân Bey 1254’de ber-hayât olup Ali Bey’in diğer mahdûmu es-Seyyid Mehmed Nûrî Bey 1268’de ber-hayât idiler.