[146] Amasya mülhakâtından Zeytun kazâsının eski merkezi olan Avlağu kasabasından İbrâhim’in oğludur. Bir müddet Amasya’da İçerişehir’de Tekke Medresesi’nde ikâmet ve Sipâhi Hâfız Ömer Efendi’nin halka-i tedrîsinde tahsîl-i ulûma gayret etdi.
Ba’dehû İstanbul’a gidip Ayasofya Medresesi’nde ikâmet ve meşâhîr-i ulemâdan ikmâl-i tahsîl ederek mücâz ve bi’l-imtihân Ayasofya Câmiinde ders-i âm ve 1260 senesi rebîülevvelinde müderris oldu. İki defa icâzet verip esnâ-yı tedrîsinde devre-i medârisi ikmâl ederek 1291 muharreminde Girit mollası oldu.
Ba’dehû Sobice kazâsı ile mütekâid olduğu esnâda bilâd-ı hamse pâyesiyle taltîf edilip Ayasofya Câmi-i şerîfinde hadîs ve tefsîr tedrîsâtıyla meşgûl olduğu halde 1295’de dâr-ı naîme irtihâl etdi. Kibâr-ı mevâlîden fâzıl, kâmil, gâyet müteşerri’’, sâlih bir zât idi.