Amasya mülhakâtından Köprü kasabası eşrâfından el-Hâc Abdurrahmân Ağa’nın mahdûmudur. Köprülüzâde Fâzıl Mustafa Paşa’nın sadâretinde enderûna girip Bostancılar ocağına kayd edildi. Orada ta’lîm u terbiyye görüp 1117’de kozbeyci olarak temâyüz etdi.
Amasyalı Hacı Ahmed Paşa’nın bostancıbaşılığında ocak kethüdâsı ba’dehû hâsekî olup hayli mühimmât-ı siyâsiyyede îfâ-yı vazîfe ederek Sultân Ahmed Hân-ı Sâlis’e kendisini [373] sevdirdiğinden 1140 senesi ramazânında bostancıbaşı, ya’nî zabtiye nâzırı oldu.
1143 senesi rebîülâhirinde dâmâd u sadr-ı a’zam Nevşehirli İbrâhim Paşa ile ricâl-i hükûmetin katli ve Sultân Ahmed’in hal’i vak’asında infisâl edib Köprü’de ikâmete me’mûr olup geldi. Orada Tâceddîn Paşa Câmii önünde bir medrese inşâ edib sonra vefât etdi. Ehl-i hayr ve dîndâr idi.