Amasyalıdır. Hâtuniyye Câmii hatîbi Abdullah Efendi’nin mahdûmudur. Amasya ulemâsından tahsîl-i ulûm edib ders-i âm iken 1099’da Havza’da Mustafa Bey imâreti şeyhi ve Fîrûz Ağa Medresesi müderrisi oldu. 1104’de tedrîs u meşîhatten ferâgat edib İstanbul’a gitdi.
Orada Ayasofya câmii ders-i âmlarından iken Amasyalı nakîbü’l-eşrâf es-Seyyid Osmân Efendi’ye intisâb edib kürsî meşâyihi [372] silsilesine girdi. 1113’de nakîb-i müşârün-ileyhin irtihâlinde metrûkesini tezevvüc edib Yenivâlide Câmii kürsî şeyhi oldu. Ba’dehû devr-i cevâmi’ ederek Fâtih Sultân Mehmed Hân Câmii kürsî şeyhi olduğu hâlde 1138’de vefât etdi.
Âlim, kâmil, natûk, hüsn-i ta’bir u ifâdeye mâlik, nîk-nefes bir zât idi. Mahdûmları Mehmed, Abdullah Efendiler de meşâyih u ulemâdan idiler. Bunların li-ümmin birâderleri sudûrdan es-Seyyid Ömer, Abdullah Efendilerin sâye-i ikbâlinde tefeyyüz etmişlerdi.