Amasyalıdır. Pervâne Bey Mahallesi’nde konağı olan Peçelizâde Hasan Paşa’nın mahdûmudur. Pederinin maktûlen vefâtında Amcazâde [469] Hüseyin Paşa’nın dâ’iresine girdi. Müşârün-ileyhin irtihâlinde Amasyalı Ammîzâde Türk Mehmed Ağa’nın Ağaları silkine dâhil oldu. Ba’dehû Kapıcızâde el-Hâc Ahmed Paşa’nın dâ’iresine intisâb edib ta’ayyün etdi.
1127’de müşârün-ileyhin i’dâmında Nevşehirli İbrâhim Paşa’nın dâ’iresine intisâb edib müşârün-ileyhin sadâretinde dergâh-ı âlî kapıcıbaşılığı ile hidemât-ı mühimmede istihdâm edildi. Îrân muhârebâtında orduya gidip geldi. Ba’dehû baş bâkî kulu olarak ricâl-i devlet sırasına girdi.
1143 senesi rebîülâhirinde Dâmâd İbrâhim Paşa’nın şehâdeti ve Sultân Ahmed-i Sâlis’in hal’i üzerine ma’zûl u münzevî oldu. Ba’dehû 1147’de çavuşbaşı, 1148’de sânîyen baş bâkî kulu ve ba’del-azl 1151’de silahdâr ağası oldu.
1154 senesi cumâdelulâsında ma’zûl iken surre-i hümâyûn emîni olup Hicâz’a gitdi. 1155 senesi rebîülevvelinde avdetini müte’âkib Zanalızâde es-Seyyid el-Hâc Ahmed Paşa sadâretten azl edildiği münâsebetle tekâ’üd edilip 1157 hudûdunda vefât etdi. Buna “Sûkûr Ali Ağa” da denirdi. [470]