Amasyalıdır. Tercemesi yukarıda geçen Tabuk Bey’in mahdûmudur. Tûl müddet Amasya kalesi dîzdârı ve Amasya muhâfızı olarak ümerâdan oldu. 675’de Mısır harbinde esîr olup 681’de Abaka Hân’ın vefâtında esâretten kurtuldu. Mısır’dan gelip sânîyen dîzdâr-ı kal’a-yı bâlâ olduğu hâlde 702 senesi şevvâlinde vefât etdi.
Meşâhîr-i ümerâdan zî-nüfûz bir zât idi. Halfet Gâzi [467] Türbesi karşısında Hacı Şâdgeldi Paşa’nın türbesi derûnunda ayak tarafında medfûndur. Seng-i mezârında şu kitâbe vardır:
“Tüvüffiye el-merhûm el-mağfûru leh Seyfu’d-dîn Sunkur Dîzdâr bin Tabuh fî-şevvâl senete isneteyn ve seb’i mi’e”.
Balıkesir Meb’ûsu İsmâ’îl Hakkı Bey “Kitâbeler”eserinde bu kitâbenin târîhini pek yanlış bir sûrette kırâ’at u kayd itmiş olduğu kütübhâneler müfetdiş-i umûmîsi müverrih-i meşhûr Ahmed Tevhîd Bey tarafından tashîh edilmişdir. “Ikdü’l-Cümân”da “Emîr Seyfeddîn Sunkurca” diye mezkûrdur.
Mahdûmları el-Hâc Şehâbeddîn Ahmed, Kemâleddîn İsmâ’îl Beylerdir. Hacı Ahmed Beyzâde Hızır Çelebi mahdûmu fâzıl ve şâir-i meşhûr Ahmedî İbrâhim Çelebi’dir. El-Hâc İsmâ’îl Bey’in evlâdı pek çoktur. Bunlardan sadr-ı esbak Bâyezîd Paşa bin Yahşî Bey bin Îsâ Bey bin Süleyman Bey ve Yûnus Paşa bin Hızır Bey bin Yûnus Bey pek meşhûrdur. Bunlara “Sunkuroğulları” dendi.