Merzifonludur. Vüzerâdan Merzifonlu Tuz Mehmed Paşa’nın birâderi Hacı Mustafa Ağa’nın mahdûmudur. Genç iken Enderûn-i Hümâyûn’a girip tahsîl ve terbiye gördü. Ba’dehû kapıcıbaşılıkla çıkıp taşra hidemâtında istihdâm edildi.
Bir müddet musâhib-i şehriyârî ve Merzifon mâlikânesi mutasarrıfı Abdî Bey’in Merzifon’da vekîli ve Çelebi Sultân evkâfı mütevellîsi, sonra İstanbul’a gelip silâhdâr ağası, 1193’de sipâhiler ağası oldu. Bu esnâda Kaptân-ı deryâ Gâzi Hasan Paşa’nın kethüdâsı Gürcü Yûsuf Ağa ile münâsebetlerde bulundu.
Bâde’l-azl silâhdâr ağası, sonra sipâhiler ağası olup Sadr-ı a’zam Şâhin Ali Ağa’yı gücendirdiğinden azl ve 1201’de Kütahya’ya i’zâm edildi. Fakat üç ay sonra sadrâzam olan mezkûr Gürcü Yûsuf Paşa’nın himmetiyle afv ve ıtlak edilip maiyyetinde Ordu-yı Hümâyûn ile Sofya’ya gitdi.
1202 senesi şâbânının evâilinde uhdesine rütbe-i vezâret tevcîh edilerek Anadolu ve Rumeli’den [353] İsmail ordusuna müretteb olan asâkirin sevkine me’mûr ve îfâ-yı vazîfeden sonra 1203’de Mihâdiye inhizâmını müteâkib Akkirman Kalesi muhâfızı oldu.
1204 senesi evâilinde Ruslar’ın Akkirman’ı muhâsara etdikleri esnâda Akkirman halkının teslîm ısrârına karşı dayanamayıp harb ve müdâfaa etmeksizin kaleyi teslîm ederek avdet etmişdi. Bu esnâda Yûsuf Paşa sadâretden azliyle Cezâyirli Gâzi Hasan Paşa sadrâzam ve serdâr-ı ekrem olduğunu müteâkib rebîülevvelde i’dâm etdirdi. Mahdûmu Ali Bey’dir.