Hâcıköylüdür. Oranın müftüsü Dârendeli el-Hâc İsmâ’îl Hakkı Efendi bin el-Hâc Ömer Fevzî Efendi bin Dârendeli Mustafa Ağa’nın mahdûmudur. 1279’da doğdu. Pederinden mukaddimât-ı ulûmu görüp Amasya’ya geldi. Ulemâdan Amasya müftüsü Gürcü el-Hâc Osmân Efendi’den ikmâl-i tahsîl edib Şirvânî Hacı Îsâ Efendi’den de tefsîr u hadîs okudu.
Ba’dehû avdet edib Gümüşhâcı köyünde tedrîs-i ulûm etdiği esnâda pederinin irtihâline mebni 1305 senesi saferinde Hâcıköyü kazâsı müftülüğüne ta’yîn edildi. Hüsn-i idâresine binâ’en yirmi beş yıl bilâ-fâsıla tedrîs u iftâ ederek 1330 senesi receb-i şerîfinin on üçüncü [56] günü hazirânın on beşinde dâr-ı na’îme irtihâl etdi.
Âlim, fakîh, gâyet mü’eddeb, vakûr, müdebbir, kerîm, sofrası güşâde, mekâdir-i nâsa murâ’î, nâfizü’l-kelim, gâyet afîf, müteşerri’, müttakî, hâdim-i din ü devlet bir zât-ı sütûde-simât idi. Kazânın terakkiyâtında pek büyük himmetleri sebk etmişdir.
Hâcıköyü’nde neşr-i ulûma hizmet eden Çerkes İsmâ’îl Efendi kendisini tanıtmak için bu muhterem zât hakkında ba’zı dedikodu çıkardı. Fakat müdrik olan kazâ halkı bu tefevvühâta ehemmiyet vermedi. Nihâyet İsmâ’îl Efendi Havza kazâsı müftülüğüne ta’yîn edilerek dili kesildi.
Mahdûm-ı yegânesi Alî Rızâ Efendi kendisine hayrü’l-halef olarak irtihâlinde kazâya müftî ve İstiklâl harbinde fedâkârâne himmetleri sebk ederek Amasya meb’ûsu olmuştu. Bunun mahdûmu İsmâ’îl Hakkı Efendi’dir.