Amasya ümerâsından Sâlih Bey bin İlyâs Bey’in mahdûmudur. Sipâhî meşâhîrinden olup Samsun ve Sinop’un fethinde fevka’l-âde yararlığı görüldüğünden ümerâdan oldu.
Amasya vâlîsi Emîr Mübârizeddîn Halîfe Gâzi’nin zamân-ı gaybûbetinde vâlî kâ’im-makâmı ve bir müddet Amasya cândârı olup Baba İshak Kefersûdî isyânında vefât etdi. Şüc’ân-ı ümerâdan olup Amasya’da mahallesi vardır.
Amasya’da Hacı Çaruk Mahallesi, Hacı İlyâs Mahallesi’nin garbında kâ’in bir mahalle-i kâdime olduğu Yakut Paşa vakfiyesinden anlaşıldı. Burada emîr-i müşârün-ileyhin bir mescidi var idi. Bunun yerine Yörgüç Paşa’nın câmii ve imâreti binâ edildi.