Amasyalıdır. Amasya’nın Köyceğiz Mahallesi eşrâfından Kazancıoğlu el-Hâc Ahmed Ağa’nın mahdûmudur. Bunlara “Kazganîzâdeler” de denir. Gençliğinde pederiyle İstanbul’a gidip enderûn-ı hümâyûna girdi.
Orada hüsn-i terbiye görüp silahdâr-ı şehriyârî Dimetokalı es-Seyyid Mehmed Ağa bin Şa’ban’a kendisini sevdirdiğinden müşârün-ileyhin 1148 şa’banında vezâreti ve müte’âkiben sadâreti üzerine dâ’iresi ağalarından olup sonra kapıcıları kethüdâsı ve ba’de’l-infisâl kapı kethüdâsı olarak devr-i bilâd etdi. [479]
1171 senesi rebîülâhirinde Silahdâr Paşa’nın vefâtına binâ’en Ayşe Sultân kethüdâsı, 1172 senesi rebîülevvelinde kapıcıbaşılıkla matbah emîni, 1175 senesi recebinde surre-i hümâyûn emîni oldu. Ancak anbâr emânetlerinde zulm ü i’tisâfı olduğu işitilmekle sene-i mezbûre şa’banında i’dâm edildi.
Mahdûmu İsmâ’îl Bey’dir. Pederinin adı Ahmed Ağa olduğu 1186 târîhli hüccet-i şer’iyyede görüldü. Amasyalı İsmâ’îl Ağa’nın dâmâdı olduğu da anlaşıldı. Üsküdâr’da medfûndur. Mahdûmu da 1181’de vefât edib yanında medfûndur.