Köprülüdür. Meşâhîr-i ulemâdan Köprü’de Fâzıl Ahmed Paşa medresesi müderrisi es-Seyyid eş-Şeyh Mustafa Efendi bin es-Seyyid Ebûbekir’in mahdûmudur. Amasya’da müftü olan Çorumlu es-Seyyid Hâfız Mehmed ve İstanbul’da Allâme Kazâbâdî Ahmed Efendilerden ikmâl-i tahsîl ederek müderris oldu.
İstanbul’da yıllarca tedrîs-i ulûm edib icâzet verdi. Fâtih mücîz ders-i âmlarından olup devr-i medâris-i mu’tâde ederek dârü’l-hadîs-i Süleymaniye müderrisi olduğu hâlde 1167 senesi evâ’ilinde vefât etdi. Üsküdâr’da ikâmet etdiğinden Miskinler mezârlığında medfûndur.
Fâzıl, muhakkik, ulûm-ı ma’lûmede mâhir bir zât idi. Evâ’il-i tedrîsinde bir müddet bostancıbaşı Köprülü el-Hâc Süleyman Ağa’ya imâmet eylediğinden beyne’l-ulemâ “İmâm Efendi” demekle meşhûr oldu. Mahdûmu es-Seyyid Ebûbekir Niyâzî Efendi mevâlidendir. İmâmzâdelikle meşhûrdur.