Köprülüdür. Amasya ulemâsından tahsîl-i ulûm edib Köprü’ye avdetle ders-i âm ve 1114’de Lalacık zâviyesi meşîhati ve mâlikânesi mutasarrıfı oldu. Ba’dehû Taşanzâde Hasan Bey câmii kürsî şeyhi, mükerreren Köprü nakîbü’l-eşrâf kâ’im-makâmı olduğu hâlde 1159 senesi zilka’desinin ikinci günü vefât etdi.
Âlim, sâlih, müteşerri’ bir seyyid-i zî-şân idi. Yirmi yıl kadar nekâbette kaldığından “Nakîb Efendi” demekle meşhûr olmuştu. Mahdûmları es-Seyyid Mustafa, Abdullah Efendiler [471] kendisine hayru’l-halef oldular. Es-Seyyid Mustafa Efendi 1166 recebinde ve es-Seyyid Abdullah Efendi 1201’de vefât etdi. Es-Seyyid Mustafa Efendizâde es-Seyyid Feyzullâh Efendi 1176’da fevt oldu.
Es-Seyyid Mustafa Efendi’nin diğer mahdûmu es-Seyyid el-Hâc Ahmed Efendi vâ’iz ve şeyh olup 1204’de vefât etdi. Bunun mahdûmları es-Seyyid Abdullah, Feyzullâh Efendiler olup va’z ü meşîhat cihetlerine mutasarrıf oldular. Es-Seyyid Feyzullâh Efendi 1208’de fevt olup es-Seyyid Abdullah Efendi müstakillen vâ’iz ü şeyh oldu.