Amasya’nın Çeribaşı Mahallesi eşrâfından el-Hâc Alî Ağa’nın oğludur. Gürcüzâde el-Hâc İsmâ’îl ve İbrâhim Beylerin teyzezâdesi olduğu münâsebetle Torumtay vakfı tevliyeti da’vâsında onlara müşârik ve bir müddet mütevellî oldu.
Pederinden sonra Çeribaşı câmii vakfına da mütevellî olup sonra Torumtay vakfı tevliyetinden ferâgat etdi. 1141’de meclis-i a’yân a’zâsı olup 1142 vak’asında hizmet eylediğinden Köprülüzâde Abdullah Paşa’nın berâ-yı tahkîk [472] Amasya’ya vürûdunda hizmeti takdîr edilip 1145’de Tokat voyvodası ve Amasya beytü’l-mâl emîni oldu.
Ba’dehû Amasya mübâya’acısı ve 1151’de Samsun emîni olup 1153’de istikâmeti tebeyyün etdiğinden dergâh-ı âlî kapıcıbaşılığı ile taltîf edildi. 1156’da meclis-i a’yân a’zâsı ve 1158’de başa’yân olup Îrân harbine gitdi. 1161’de vefât etdi.
Meşâhîr-i a’yândan olup Çeribaşı câmi-i şerîfinin kıble tarafında kâ’in konağı mükellef, sofrası küşâde, hânedân bir zât idi. Câmi-i şerîfin evkâfını tanzîm edib hayli nukûd vakf ederek tevsî’ etdi. Mahdûmlarından el-Hâc Abdulbâkî, Mehmed Ağalar ma’rûftur.