Amasyalıdır. Ya’kûb Paşa Mahallesi eşrâfından Hacı Sinan Ağazâde el-Hâc Mehmed Ağa’nın mahdûmudur. Gençliğinde enderûn-ı hümâyûn mektebine girip kilâr-ı âmirede hüsn-i terbiye gördü. Orada bi’t-tefeyyüz ser-çavuş ve 1131’de kilâr kethüdâsı oldu.
Bu esnâda Sadr-ı a’zam Dâmâd İbrâhim Paşa’yı bir husûstan dolayı gücendirdiğinden 1134’de Enderûn’dan ihrâc edilerek Amasya’ya gönderilip Hüseyin Ağa vakfı tevliyetiyle [468] çerağ ve ba’dehû Fîrûz Ağa tevliyeti de ilâve edildi.
Beş yıl kadar iki vakfı hüsn-i idâre edib 1139’da muhâsebesi rü’yet edilerek berîü’z-zimme olduğu anlaşılmağla bâ-izn-i âlî Hicâz’a gitdi. Avdette Amasya mukâta’âtı emîni olup 1142 vak’asında ibrâz-ı sadâkat ve hüsn-i hizmet eyledi.
1143 senesi rebîülâhirinde Dâmâd İbrâhim Paşa’nın katli ve Sultân Ahmed-i Sâlis’in hal’i üzerine tahta cülûs eden Sultân Mahmûd Han’ın lalası Osmân Ağa’nın himmetiyle dergâh-ı âlî kapıcıbaşılarından olup Amasya mübâya’acısı oldu.
1146 senesi şa’banında Amasya sancâğı mütesellimi, ba’dehû Tokat voyvodası ve Amasya beytü’l-mâl emîni oldu. Ba’dehû Îrân muhârebâtı devâmında Sivas vilâyeti mübâya’acısı olup 1151’de avdet etdi. 1152’de Amasya baş a’yânı olup 1153 senesi şa’banının dokuzunda vefât etdi. Meşâhîr-i a’yândan işgüzâr, hânedân bir zât idi.