Vakfiyesinde tasrîh edildiği üzere Amasyalıdır. Amasya ümerâsından Dervîş Beyzâde Hüseyin Bey’in mahdûmu olup Ankebût Ahmed Paşa’nın akrabâsından olduğu münâsebetle mi’mârân-ı hâssa ocağında tefeyyüz ederek Kara İbrâhim Paşa’nın sadâreti evâ’ilinde Ahmed Ağa’nın yerine ser-mi’mâr-ı hâssa oldu.
Fenn-i bedî’-i mi’mârîde mahâret u ihtisâsı olduğundan [451] hayli ebniyye-i mîriyye inşâ’atında hizmet ve on yedi yıl kadar mevki’ini hüsn-i muhâfaza etdi. O zamânın en nâfizü’l-kelim erkânından Hâce-i Sultânî Şeyhülislâm es-Seyyid Feyzullâh Efendi’ye kendisini sevdirmiş olduğundan Fâtih civârında kâ’in medrese ve kütüb-hânesi binâsına me’mûr oldu.
El-yevm tarz-ı bedî’-i mi’mârîsi erbâb-ı takdîri hayrân eden medresesi ve kütüb-hânenin inşâsı hitâmında ba’zı garaz-kârân tarafından isnâd edilen ba’zı nekâyıstan dolayı azl ile mükâfat gördü. 1113’de ba’zı erbâb-ı himem tarafından sevk ü ta’rîf edilerek Atik Alî Paşa evkâfı tevliyetiyle çerağ edildi.
Bu esnâda Tavuk pazarında kendi tarafından bir dârü’l-hadîs ve mekteb binâ ve inşâ edilerek san’at-ı mi’mâriyyesini gösterdi. Vakfiyesini tanzîm etdirdi. 1117 senesi rebîülevvelinde Amasya’da Pervâne Bey câmii ittisâlinde bir mekteb inşâ etdirip Bakkallar çarşısında üç bâb dükkân ve bir menzil vakf etdi.
1123’de bâ-rütbe-i hâcegânî mevkûfâtcı, 1127’de defter [452] emîni olduğu hâlde 1129’da vefât etdiği muhâsebe defterinde görüldü. Amasyalı Rahtuvân Mehmed Paşa’ya hayâtında ikrâz eylediği üçbin kuruşu 1126’da mevkûfâtcı iken bi’l-muhâkeme Paşa’nın veresesinden aldığı i’lâmı da görüldü.
Fenn-i mi’mârîde mahâret ü iktidârını âsârıyla göstermiş, erbâb-ı ma’ârifden kerîm, sâhib-i hayrât bir zât idi. Atîk Alî Paşa câmii harîminde kâ’in menzil-i kebîrini evlâdına vakf etmişdi. Mahdûmları Hüseyin, Feyzullâh Efendilerdir. Kerîmesi Ayşe Hânım’dır. Hüseyin Efendi de ricâlden olup 1155’de vefât etdi. Mahdûmu Sa’dullâh Bey’dir. Dâmâdı Amasyalı Yûsuf Efendizâde şeyhü’l-kurrâ Hâfız Mehmed Efendi’dir.