Sâlih oğludur. Amasya’da İsmâ’îl Efendi’den tahsîl-i ulûm ve hıfz-ı Kur’ân edib ders-i âm ve hüsn-i sadâ ve hâline binâ’en 1107’de Pervâne Bey câmi-i şerîfine imâm oldu. Yıllarca imâmet, tedrîs ve ta’lîm-i Kur’âna muvâzabet ederek 1117’de ilk def’a Mi’mâr Hasan Efendi mektebine mu’allim ve bâ’dehu câmi-i mezbûra kürsî şeyhi olduğu hâlde 1129 senesi evâhirinde vefât etdi.
Âlim, sâlih, kâri’-i Kur’ân, hâfız-ı mücevvid bir zât idi. [453] Mahdûmları İsmâ’îl, Sâlih Efendilerdir. Bunlar müştereken câmi-i mezkûra imâm olup İsmâ’îl Efendi 1149’da ve Sâlih Efendi de 1162’de vefât etdi. İsmâ’îl Efendizâde Mustafa Efendi imâm olup 1172’de imâmeti mahdûmu Hâfız Hasan Efendi’ye kasr-ı yed etdi. Bunlara “İmâm Hâcezâdeler” dendi.
Hâfız Hasan Efendi 1208’de vefât edib mahdûmu Osmân Efendi imâm oldu. Bu zât, kısa boylu biraz şişko olduğu münâsebetle “Yumuk Osmân Efendi” diye iştihâr ve 1220’de irtihâl etdi. Oğulları Abdullah, Mehmed Efendilerden Abdullah Efendi 1271’de ve Hâfız Mehmed Efendi de 1276’da vefât etmişlerdir. Bunlara “Yumuk Osmânzâdeler” dendi.
Abdullah Efendizâde el-Hâc Mehmed Efendi sandık emîni olduğu hâlde 1293’de vefât etdi. Amasya erkânından ma’dûd idi. Mahdûmları Osmân Nûrî, Ahmed Reşîd Efendiler’dir. Bunlara da “Sandık Emînizâdeler” dendi. 1314’de yek-diğerini müte’âkib vefât edib gitdiler. Hayfâ ki
Bir âşık-ı şûride-dili yakdılar eyvâh
İmdâd ide bî-çâre yanık aşkına Allâh
belediye a’zâsındân mütedeyyin adamlardı. [454]
Hâfız Mehmed Efendi câmi-i mezbûr imâmı olup mahdûmları Ahmed, Abdulkâdir Efendilerdir. Ahmed Efendi, “Hacı Müsevvid” demekle meşhûr fukahâdan olup imâmeti küçük mahdûmu Hâfız Mehmed Rüşdü Efendi’ye kasr-ı yed ederek 1312’de Mekke-i mükerreme civârında Cidde mevki’inde vefat etdi. Büyük mahdûmu Amasya müftüsü el-Hâc Hâfız Mehmed Tevfik Efendi’nin tercemesi yukarıda yazıldı. Abdulkâdir Efendi de 1323’de vefât etdi.