Amasya’nın İlarslan nâhiyesi eşrâf ü ümerâsından ve meşâhîr-i hâcegânından Hâce İbrâhim Çelebi bin Hasan Şâh Çelebi bin Alparslan Şâh bin Sultân Tâceddîn Altunbaş Gâzi Çelebi bin Sultân Gıyâseddîn Mes’ûd bin Sultân İzzeddîn Keykavus-ı Selçukî mahdûmudur.
Bu da eşrâf-ı ümerâdan ve meşâhîr-i hâcegân-ı tüccârdan olup [359] sarf-ı ticâretle iştigâl ve çiftliği hâsılâtıyla idâre-i ahvâl ederek umûr-ı siyâsiyyeden fevka’l-âde taharrüz eylediğinden Amasya vâlîlerinin kendisine karşı hürmet ü ri’âyetlerini celb etmişdi.
İlarslan nâhiyesi Amasya hükümdârı Hacı Şâdgeldi Paşa tarafından esâsen bunun ceddi Alparslan Şâh’a temlîk edilmişti. Bunun evlâdı tekessür etdikçe mezkûr nâhiye de inkısâma uğramış; ba’zıları da kendi hisselerini satmış olduğundan sâhib-i tercemeye nâhiyenin yirmide biri kadar yeri kalmışdı.
Kendisi ve pederi Gelkiras kasabasında ikâmet ve hisse-i mâlikânesini hüsn-i idâre ederek 867 senesinde vefât etdi. Gâyet kerîm, hânedân, asâlet ve necâbeti her hâlinde nümâyân, sâhib-i hayr ü hasenât idi. Mezkûr kasabada bir mescidi vardır. Seksen yaşına varmışdı.
Oğulları Tâceddîn İbrâhim, Hayreddîn Hızır, Selîm Çelebiler’dir. Küçük mahdûmu Selîm Bey Amasya’da vâlî bulunan Sultân Bâyezîd-i Sânînin ma’iyyet-i ümerâsından iken gâyet hüsnâ olan kerîmesi Ayşe Hundî Hâtun’u tezevvüc [360] buyuruldu.
Hâce el-Hâc Tâceddîn Çelebizâde el-Hâc İvâz Çelebi’dir. Hayreddîn Hızır Bey, mu’ahharan Şehzâde Sultân Abdullah lalası ve ba’dehû Trabzon Beylebeyi olan Hayreddîn Paşa’dır. Mahdûmları Hasan Paşa ile Mehmed Bey’dir. Mehmed Beyzâde Şücâ’eddîn Paşa ma’rûfdur.
Selîm Bey’in mahdûmları Mehmed Şâh, Kâsım Çelebiler ve kerîmezâdesi Sultân Selîm Han’dır. Mehmed Şâhzâde Kâsım Paşa vüzerâdandır. Kâsım Çelebi, Sultân Bâyezîd-i Sânî devrinde dîvân-ı hümâyûn kâtibi olup “Tozkoparan” demekle meşhûrdur. İstanbul’da mescidi hazîresinde medfûndur.