Amasyalıdır. Esbak Amasya müftüsü mevâlî-i devriyeden Sandukîzâde Abdülcelil Efendi’nin mahdûmudur. 1043’de pederinin irtihâlinde sipâhi Meşâhîrinden olup Revân ve Bağdad muhârebâtında isbât-ı liyakât ederek Amasya kethüdâ-yeri ve 1055 senesi muharreminde Amasya mütesellimi oldu. Ancak mîr-livâ Ebûbekir Bey’in taşkın hareketi yüzünden [69] sene-i mezbûre şevvâlinde her ikisi de azl ve habs edildi. 1056 senesi evâilinde Sefer Ağa’nın kefâletiyle Amasya kalesi zindanından tahliye ve itlâk edildi.
Ba’dehû yapılan tahkîkâtda berâeti anlaşılmakla bir müddet ma’zûl kaldı. Ba’dehû Sivas vilâyeti hazinedârı olup 1062 senesi şevvâlinde Sultân Bâyezîd evkâfına mütevellî ve 1063 senesi zilka’desinde mutassarıf Hasan Paşa tarafından sânîyen Amasya mütesellimi oldu.
1064 senesi saferinde mutasarrıfın tahvil-i memûriyet etmesine binâen tevliyette kaldı. Ba’dehû İbşîr Paşa’nın sadâretinde kethüdâsı Amasyalı Sâlih Ağa’nın sâye-i ikbâlinde Sivas Vali kâ’im-makâmı olup 1065 senesi evâhirinde ma’zûlen Amasya’ya geldi.
1067’de Ankebût Ahmed Paşa’nın kethüdâsı olup müşârün-ileyhin sadâret kâ’im-makâmlığında nüfûz ve ikbâle erdi. Müşârün-ileyhin azlinde bir müddet menkûb olup 1074 senesi muharreminde Vanlı Mehmed Paşa tarafından üçüncü defa Amasya mütesellimi oldu.[70]
1075 senesi cumâdelûlâsında İstanbul’a gidip livânın hesabâtını vermeye davet edildiğinden yerine diğeri nasb edildi. Verdiği hesabâtda berâat-i zimmeti sâbit olmakla 1076 senesi muharreminde râbian Amasya mütesellimi oldu.
1077 senesi muharreminde müddet-i tesellümü hitâma erdiğinden yine İstanbul’a gidip şevvâlinde Sultân Süleyman evkâfı mütevellîsi, ba’dehû emîn-i ğanem olup 1084 senesi zilka’desinde emvâl ve emlâkını vakfederek bir mâh sonra vefât etdi.
Müstakîm, işgüzâr olup dergâh-ı âlî kapıcıbaşılarından idi. Mahdûmlarından Mehmed Ağa kendinden evvel vefât etdi. Bunun mahdûmu Abdülhalim Ağa’dır. Tersâne kethüdâsı olup mahdûmu Abdülcelîl Ağa 1148’de dergâh-ı âlî çavuşânından görüldü.
Hüseyin Ağa’nın diğer mahdûmu Hasan Paşa’dır. Musûl beylerbeyi oldu. Üçüncü mahdûmu dergâh-ı âlî kapıcıbaşılarından Abdülcelil Ağa olup Musûl hânedânı olan Abdülcelilzâdeler bunun evlâdı [71] kuyûd-ı resmiye ile sâbitdir.