Rizeli Ali oğludur. Evâil-i hâlinde Köprülü Mehmed Paşa’ya intisâb edib dâiresi ağalarından oldu. Müşârün-ileyhin saâdet ve felâketi zamanlarında sâdıkâne hizmet eyledikden bir müddet kethüdâsı ve zaman-ı sadâretinde Köprü’deki emlâkı nâzırı olup orada ikâmet etdi.
1069’da Abaza Hasan Paşa’nın tarafdârları hakkında icrâ edilen şedîd-i istîsâl esnâda hayli işgüzârlığı görüldü. Köprülü Mehmed Paşa’nın Amasya ve Sivas ve mülhakâtında vasıta-i icrâiyesi hükmünde olduğundan gâyet nüfûz ve itibâr kazandı.
Bir müddet Köprü voyvadası olup o kazâyı şiddetiyle uyutdu. Orada ikâmet etdiği mahallede câmi ve medrese yaptırdı. Köprülüzâde Fâzıl Ahmed Paşa’nın evâsıt-ı sadâretlerinde azl ve her türlü nüfûzdan tecrîd edilerek Hicâz’a gitdi. 1080 senesi evâilinde vefât etdi. Hayr ü şerre yarar, cesûr, dindâr, sâhib-i hayrât ve hânedân bir kimse idi.[63]