Amasyalıdır. Esbak Amasya mütesellimi el-Hâc Abdünnebi Ağa bin el-Hâc Ahmed Ağa’nın mahdûmudur. Tahsîl-i maârifden sonra Divân-ı Hümâyûn kitâbetiyle çerağ edildi. Ba’dehû tefeyyüz ederek Bayram Paşa’nın sadâretinde reisülküttâb oldu.[56]
1048 senesi rebîülevvelinde müşârün-ileyhin irtîhâlini müteâkib riyâsetden azl edilib bir mâh sonra mukâbele-i süvârî, ba’dehû Anadolu muhâsebecisi oldu. Buradan da ba’del azl mukâtaa emîni, sonra çavûşlar kâtibi, 1060’da şehir emîni ve 1061’de sânîyen reisülküttâb oldu.
1063’de riyâsetden azl edilib sonra arpa emîni ve 1065’de bevvâbân-ı şehriyârî kâtibi oldu. 1066’da tezkîre-i sadr-ı âlî, 1068’de reisülküttâb kâ’im-makâmı olup 1073 senesi zilka’desinde ma’zûlen vefât etdi. Sâkin olduğu menzili oğulları İbrâhim, Abdurrahman ve Çelebilere ve kızı Râbia Hânım intikâl etdiği ve târih-i irtihâli müsakkafât vakfı defteri’nde görüldü