Amasya’da Dirâğiye Mescidi imâmı Ahmed Çelebi mahdûmudur. Müderris-i meşhûr Mevlânâ Abdî Çelebi’den ikmâl-i tahsîl ederek [519] ders-i âm oldu. Bu esnada Mehmed Paşa câmii ikmâl edilip pek yakınında bulunan Dirâğiye Mescidi hücreler ilâvesiyle medreseye tahvîl edildikte ilk müderrisi oldu.

Ba’dehû Habîb-i Karamânî Hazretleri’nin sohbet-i şerîfesine mülâzım olarak müşârün-ileyhin hizmetlerinde füyûzât-ı ma’neviyyeden müstenîr oldukta terk-i tedrîs edib hulefâsından ve dâr-ı bekâya irtihâlinde zâviyesi şeyhi ve Mehmed Paşa Câmii vâ’izi oldu.

Kırk yıl kadar zikr ü tevhîd, ifâde ve tezkîr, nakl-i hadîs u tefsîr, irşâd-ı halk ile iştigâl edib bütün a’yân u halkın mahbûb-ı kulûbu olduğu hâlde 940’da dâr-ı kudse irtihâl etdi. Âlim, fakîh, zâhid, vâ’iz, gâyet müteşerri’, âbid, mazınne-i kerâmet, keşfi açık bir zât-ı sütûde-simât idi. Kaddesallâhu sırrahü’l-azîz.

Mecdî Mehmed Efendi “Terceme-i Şakâyık”ta diyor ki: “Ârif-i billah Amasiyyevî Seydî Halîfe Rahimehullâhu Te’âla meşâyih-i i’zâm ve evliyâ-yı kirâmdan mârü’z-zikr Şeyh Habîb hazretlerinin hulefâsındandır. Merhûm şeyh Habîb’in Şehr-i Amasya’da olan [520] zâviyesinde seccâde-i irşâda cülûs edib teşnegân-ı zülâl-i füyuzât-ı ilâhiyyeye imdâd u ifâza üzere iken vefât edib zâviye-i mezkûrede defn olundu.”

Anâ-i revâh u etrâf-ı sabâhda mücâhede üzere olup heybet ve sukûn ü vakârı hâvî ve şeb ü rûzda sâ’im u kâ’im idi. Merhûm Seydî Halîfenin vefâtı zamânında hâzır u nâzır olanlardan mu’temed bir sâlih u dîndâr kimse rivâyet eyledi ki:

Mürg-ı rûh-ı kudsı âşiyân-ı âlem-i bâlâya pervâz itmege âgâz eyledikde cennetde kendi makâm-ı vâlâ vü menzil-i a’lâsını ayne’l-yakîn müşâhede edib esnâf-ı âlâf-ı iştiyâkla derûnı mâl-â-mâl oldu. Bu dâ’iye ile Cenâb-ı Rabbü’l-erbâba ruhûmu seri’an kabz edib min gayri te’hîr beni menzil ü makâmâtıma îsâl eyle deyü zârî vü hanîn ve tazarru’ u enîn eyledi.

Merhûm-ı merkûmdan bu tazarru’ u zârînin husûsunda istikşâf-ı hâl eylediğimde ravza-i Rıdvânda hûr u gılmân bana makâmımı irâ’et edib iltikâ-i likâ-i Rahmân’a dâ’vet iderler. Anınçün ol canibe müncezib oldım deyü cevâb virüb envâ’-ı meserret ü şadmânî ve esnâf-ı behcet ü kâmrânî ile makâm-ı [521] mahmûd-ı ma’hûde su’ûd-ı pür-sü’ûd eyledi. Kaddesallâhu sırrahü’l-azîz.”

Amasya’da meşhûr olduğu üzere şeyhi olan Hazreti Habîb-i Karamânî yanında Mehmed Paşa Türbesi’nin bâğçesinde medfûndur. Şeyh-i müşârün-ileyhin zâviyesi, câmi-i şerîfin kıble tarafında olan ve el-yevm arsa hâlinde bulunan bâğçe yerindedir. Hazretin irtihâlinde sinni seksen olduğu mervîdir.