Amasyalıdır. Ya’kûb Paşa Câmii mü’ezzini iken 1146’da vefât eden Mustafa bin Süleyman bin Halîl’in mahdûmu olup “Mü’ezzinzâde” demekle meşhûrdur. Iydîzâde el-Hâc Âkif Mustafa Efendi’nin halka-i tedrîsinde ikmâl-i tahsîl ederek tedrîse me’zûn u mücâz oldu.
Taş-âbâdî el-Hâc Ahmed, Akdağlı el-Hâc Mustafa, Çorumlu es-Seyyid el-Hâc Ali Efendilerden de ahz-ı ulûm ederek ders-i âm oldu. Yıllarca tedrîs-i ulûm u fünûn ederek iştihâr edib 1183’de Ya’kûb Paşa müderrisi oldu.
Evâhir-i ömründe tefsîr u hadîs tedrîsâtına hasr-ı evkât edib 1192 senesi şa’bânının yedinci günü seksen yaşında irtihâl-i dâr-ı mükâfât etdi. Gâyet fâzıl [386] muhakkik, müfessir, muhaddis, usûl ü fürû’da kâmil, vâ’iz, talâkat-ı lisânıyla meşhûr, âbid, menâsıb-ı dünyevîden müctenib, “Uzun Müderris” demekle pek ma’rûf, şeyhü’l-ulemâ idi.
Mahdûmları Hâfız Mustafa, Abdullah Efendilerdir. Müderrislik bunlara nısfıyyet üzere tevcîh edildi. Hâfız es-Seyyid Abdullah Efendi 1193’de vefât edib hisse-i tedrîsi meşâhîr-i fuzalâdan Gümüşhâneli es-Seyyid Ebûbekir Efendi’ye tevcîh edildi.
Hâfız es-Seyyid Mustafa Efendi de 1208’de vefât edib Ya’kûb Paşa müderrisliğinin nısf hissesi oğulları Hâfız Abdullah, Mehmed, Hasan Efendilere verildi. Hâfız es-Seyyid Abdullah Efendi 1232’de fevt olup mahdûmu “Sarı Müderris” demekle meşhûr Hâfız Mustafa Efendi müderris oldu. Hâfız es-Seyyid Hasan Efendizâde es-Seyyid Mustafa Efendi de 1257’de vefât etdi.