Amasya’da Sultân Bâyezîd Câmii imâm-ı evveli Hocazâde Hacı Hâfız Halîl Efendi’nin mahdûmu ve amcası Emîr Hacı Abdüllatîf Çelebi’nin dâmâdıdır. Gençliğinde Enderûn-i hümâyûna girip iyi tahsîl ve terbiye gördü. Ba’dehû Kıblelizâde Mehmed Bey’e intisâb ederek ma’rûfiyyet kazandı.
1151’de Zanalızâde es-Seyyid Ahmed Paşa’nın himmetiyle arpa emîni, 1153’de müşârun ileyhin sadâretinde [128] başbâki kulu ve 1154 rebîülevvelinde ma’zûl ve 1156 muharreminde çavuşbaşı oldu.
Sene-i mezbûre ramazânında ma’rûf ve 1157 muharreminde arpa emîni, 1158 şevvâlinde sâniyen çavuşbaşı ve bade’l-azl yine arpa emîni, 1159 ramazânında sâlîsen çavuşbaşı 1160 rebîülevvelinde kethüdâ-yı sadr-ı âlî ve şa’bânında cebecibaşı oldu.
Çünkü bu esnâda Firârî Hasan Paşazâde Abdullah Paşa sadrâzâm olmuştu. 1161 recebinde azl edilmişse de 1162 saferinin on beşinde sâniyen kethüdâ-yı sadr-ı âlî olup iki hemşehrî birbirini tanıdı. Bu sâyede sene-i mezbûrenin şevvâlinde bâ-rütbe-i vezâret Tırhala vâlîsi oldu.
1164 cumâdelûlâsında Bosna, 1165 saferinde Eğriboz ve rebîülevvelinde Belgrad vilâyetlerine vâlî olduğu hâlde 1166 recebinde Belgrad’da vefât etdi. Âlim, sâhib-i fazîlet bir vezîr-i muktedir idi. Mahdûmu es-Seyyid Halîl Bey erbâb-ı menâsıbdan olup 1187 recebinde vefât etdi. Kethüdâsı Emîr Hacızâde es-Seyyid Mustafa Ağa’dır. [129]