“İmam Hâce” demekle meşhûr olan bu zât evâ’il-i hâlinde Büyük Ağa Medresesi’nde ikâmet ve Kayyımzâde İsmâîl Efendi’nin halka-i tedrîsine mülâzemet ederek ikmâl-i tahsîl edib Bâyezîd Paşa Mahallesi’nde Koca Mehmed Ağa Mescidi’ne imâm ve Bâyezîd Paşa Câmi’inde vâ’iz ve ders-i âm oldu.
Sadr-ı sâbık Zanalızâde es-Seyyid el-Hâc Ahmed Paşa’nın sadâretinde ilm ü salâhına, hüsn-i hâline binâ’en, kendisine yevmî beş akçe ve du’â-gû vazîfesi verildi. Buna kanâ’at ederek va’z ü tedrîse mülâzemet ve 1181’de müsinn olduğu hâlde dâr-ı kudse rihlet etdi. Sulehâ-yı ulemâdan vâ’iz, kanâ’atkâr, zâhid bir zât idi. Halkın kendisine hüsn-i i’tikâdı vardı.