Aybatsalıdır. Mehmed bin Abdullah oğludur. Vâlidesi tarafından sâdât-ı kirâmdandır. Gençliğinde Amasya’ya gelip Mehmed Paşa Medresesi’nde ikâmet ve Çorumlu Müftü Hâfız es-Seyyid Mehmed, Tokatlı Müftü Şeyh es-Seyyid Mustafa, meşhûr Akdağlı el-Hâc Mustafa Efendiler’in halka-i tedrîsâtına mülâzemet ederek ikmâl-i tahsîl edib [46] ders-i âm oldu.
Lisânı açık, ifâdesi düzgün mütâla’ası geniş olduğu münâsebetle talebe-i ulûm arasında fevkalâde iştihâr edib hayli cem’iyyete muvaffak oldu. Mükerreren icâzet verip şâkirdân-ı irfânı çoğaldı. A’yân ve halkın ve hâssaten fuhûl-i ulemânın teveccühlerine mazhar olduğundan 1168’de Hüseyin Ağa müderrisi olarak temâyüz etdi.
Hüsn-i hâl ve fâzl-ı kemâline binaen üç def’a Amasya müftüsü ve meclis-i a’yân a’zası oldu. Evâhir-i ömründe farîza-i Hacı da îfâ ederek emîr-i müderrisînin irtihâlinde re’îsü’l-ulemâ olduğu hâlde 1182 senesi ramazânında dâr-ı bekâya irtihâl etdi. Mehmed Paşa Mezârlığı’nda medfûndur.
Fuhûl-i ulemâdan fâzıl, usûl ü fürû’da mâhir, ulûm-i akliyye ve nakliyyede muhakkik, tab’an latîf, âbid ve müteşerri’ bir zât idi. Âkifzâde es-Seyyid Abdürrahîm Efendi “el-Mecmu” adlı eserinde bunu senâ eder. Mahdûmları Hâfız es-Seyyid Mehmed, Mustafa Efendilerdir. Bunlara da “Uzun Müftüzâdeler” dendi.