Amasyalıdır. Halfet Gâzi evlâd-ı kirâmından ve ümerâdan Abdullah Bey bin el-Hâc emîr-i kebîr Alî Bey bin Süleyman Bey bin emîr Alâaddîn Alî Bey’in mahdûmudur. Yıldırım Sultân Bâyezîd Han devrinde ümerâdan olup Timur harbinde isbât-ı vücûd ederek Şehzâde Çelebi Sultân Mehmed ma’iyyetinde kaldı.
805’de Şehzâde-i müşârün-ileyh ile beraber Bolu’dan Amasya’ya avdet edib bütün muhârebâtına iştirâk etdi. 814’de Anadolu Beylerbeyi Ya’kûb Paşa’nın Şehzâde Sultân Süleyman’a arz-ı mütâva’at etmesi üzerine Anadolu Beylerbeyi olup Ankara’yı Sultân Süleyman’ın istilâsından kurtardı.
819’da Bâyezîd Paşa sadr-ı a’zam oldukta Rûmeli Beylerbeyi olup Sofya’da ikâmet etdi. 821’de Şehzâde Sultân Mustafa Edirne’yi işgâl etdiği esnâda [350] Rûmeli eyâletini hüsn-i müdâfa’a ederek Çelebi Sultân Mehmed’in galebesine ve şehzâdeyi firâra mecbûr etmesine binâ’en nâ’il-i vezâret oldu.
824’de Çelebi Sultân Mehmed Han’ın irtihâli üzerine Şehzâde Sultân Mustafa ikinci def’a kıyâm ve Rûmeli beylerini kendisine celb etdiği esnâda Sultân Murâd-ı Sânî’ye inkıyâd ederek şehzâdeyi tanımadığından 825 senesi evâsıtında şehzâdenin harbinde vefât etdi.
Müdebbir, muktedir, gâyet sâdık bir kumandân idi. Mahdûmları Abdullah, Alî Beyler’dir. Alî Bey, mu’ahharan vezîr olup Alâaddîn Alî Paşa dendi. Bunun mahdûmları Mehmed, Yûsuf Paşalardır. Sâhib-i tercemenin amcası Kazasker Mevlânâ Hasan Çelebi’dir.