Mehmed Tûsî mahdûmudur. Diyâr-ı şarkiyyede fuzalâdan tahsîl-i ulûm edib Moğol hükümdârı Abaka Han’ın nezdinde iltifât ve hürmet gördü. Ba’dehû Anadolu Nâzırı ta’yîn edilen Ilıcak Noyin’in ma’iyyetinde Amasya’ya geldi.
Ba’dehû bir müddet Merzifon’da ikâmet ve orada kazâ ve hükûmet edib nâzır-ı müşârün-ileyhin vekîl-i umûru ve kethüdâsı olan meşhûr Zogay’ın ba’zı mezâlimini def’e çalışdı. 675’de emîr-i meşhûr Celâleddîn Şâh Melik’in Amasya vilâyetini zabt ü istilâsında bir tarafa çekildi.
Ba’dehû Amasya’ya gelip tedrîs-i ulûm ederek Amasya vâlîsi ta’yîn edilen Torumtayzâde Nâsıreddîn Mehmed Bey’in zamân-ı vilâyetinde muhteremâne yaşadı. 691 sâline doğru vefât etdi. Kibâr-ı ulemâ ve kudâttan bir zât idi.