Lâdiklidir. Orada medfûn sâhibü’l-hâl es-Seyyid Ahmed kebîrü’r-Rifâ’îzâde es-Seyyid eş-Şeyh Muhyiddîn Mehmed Çelebi mahdûmudur. Ulemâdan [311] ahz-ı ulûm etdikten sonra amcası es-Seyyid eş-Şeyh İzzeddîn Hasan er-Rifa’îden âdâb-ı tarîkat u tasavvufu ahz u telakkî etdi. Bir müddet Arabistan’da seyâhat edib avdetinde Amasya’da ikâmet etdi.
Amasya hükümdârı Hacı Şâdgeldi Paşa kendisine hürmet ü ri’âyet edib zâviye yaptırdı. Paşa’nın mahdûmu olan Amasya Beylerbeyi Devâtdâr Ahmed Paşa da teveccühler ibrâz ederek müşâvirleri sırasında gördü. Fevka’l-âde nüfûz ve şöhret kazandı.
Çelebi Sultân Mehmed Han vâlî olarak Amasya’ya geldikte şâyân-ı hürmet görüp kendisine bezl-i âtıfet etdi. 804’de Ankara felâketinde Timurleng tarafından Amasya vâlîsi ta’yîn edilen Kara Devlet Şâh’a karşı muhâliflerin başında bulunduğundan Timur’un emriyle Şirvân’a i’zâm edileceği esnâda 805 senesi rebiülâhirinde dâr-ı na’îme rihlet etdi.
Âlim, sâlih, nâfizü’l-kelim, vâ’iz, mütekellim bir şeyh-i kerîm idi. Mahdûmu es-Seyyid İzzeddîn Hasan Çelebi de meşâhîrden bir zât idi. İstanbul’da mahallesi olan Seydî [312] Ömer Çelebi bunun ahfâdındandır.