Amasyalıdır. Beylerbeyilerden ve Sofular Mahallesi’nde kâin câmi-i şerîf ve Dârülhadîsin bânisi olan Abdullah Paşa evlâdından el-Hâc Abdülkerîm Paşa bin Veli Bey’in mahdûmudur. Züamâdan iken mîr-livâ olup sancâkları devr etdi. [52]
1052’de ammizâdesi olan Hacı Mustafa Bey’in vefâtına binâen ceddi Abdullah Paşa vakfına mütevvellî olarak Amasya’da ikâmet etdi. 1058’de Amasya’ya gelen seyyâh-ı meşhûr Hâfız Evliyâ Çelebi bunun konağına misafir oldu. Dokuz yıl kadar vakfı hüsn-i idâre ederek ba’zı nükûd ve musakkafât ilâvesiyle tevsî’ edib 1061’de vefât etdi. Meşâhîr-i Ümerâ ve a’yândan kerîm, servet ü sâmâna mâlik, dindâr, hânedân bir zât-ı sütûde-sîmât idi. Mahdûmu mîr-i mîrân Abdülkerîm Paşa’dır.