Köprülüdür. El-Hâc Mahmûd Ağa bin Büyük Ali Ağa bin el-Hâc Dede Yûsuf Ağa’nın mahdûmudur. Küçük yaşında İstanbul’a gelip Amcazâde Hüseyin Paşa’nın dâiresine intisâb ederek tahsîl-i maârif etdi.
1102’de Hüseyin Paşa’nın rikâb-i kâ’im-makâmlığında dâiresi kethüdâsı, 1105’de kapıcıbaşı, 1107’de şehir emîni olup 1108’de bâ-rütbe-i mîr-i mirâni Bozok sancâğı mutasarrıfı oldu. 1109 senesi rebîülevvelinde efendisinin sadâretinde celb edilerek bâ-rütbe-i hâcegânî defter emîni [98] vekili oldu.
1110’da mektubî-i sadr-ı âlî olup Paşa’nın mahrem-i hâss ve müsteşârı olarak teayyün etdi. 1114 senesi rebîülâhirinde Paşa’nın isti’fâsı ve müteâkiben irtihâli üzerine hayli müzâyakaya duçâr oldu. Bir müddet sonra muhâsebeci olarak istihdâm edildi.
Bu esnâda Köprülüzâde Numan Paşa dâmâd-ı şehrîyârî olduğundan ona intisâb edib 1121’de Hatice Sultân kethüdâsı oldu. Altı yıl kadar müşârün-ileyhânın dâiresini hüsn-ü idâre ederek teveccühâtını kazandığı halde 1127 senesinde vefât etdi. Eyüb’de medfûndur.
Âlim, kâtib, sâlih idi. Köprü’de birkaç dükkân vakf ve halîlesi Emine Hânım için eczâ-yı şerîfe vaz’ etdi. Birâderleri Mehmed, Mustafa, Ali Ağalar olup el-Hâc Mehmed Ağazâde Yahya Ağa vakfına mütevellî ve bunun birâderi Sâlih Efendi de dâmâdı oldu. Diğer yeğenleri Ahmed Ağa bin Ali Ağa 1141’de ve Hasan Ağa bin Mustafa Ağa da 1146’da vefât etdiler. [99]