Amasyalıdır. Ayas Ağa Câmii müezzini Ali mahdûmudur. Hıfz-ı Kur’ân etdikden sonra Giridli Hâfız Mehmed Efendi’den tahsîl-i vücûh-ı kıraat ve ulemâdan ahz-ı ulûm edib ta’lîm ve tedrîse başladı.
1100’de Amasya ulemâsının mahzarıyla Ayas Ağa Câmii İmâmı ve 1105’de Hamza Bey dersiyesi mutasarrıfı Mehmed Efendi’nin vefâtı [100] üzerine yine Amasya ulemâsının hüsn-i şehâdetiyle dersiyye-i mezkûre uhdesine tevcîh edilerek Henizke Karyesi ve Yenice Mezrası Malikânesi mutasarrıfı oldu.
Bunun üzerine ferağ-ı bâl ile talîm-i vücûh-ı Kur’ân’a muvâzabet ve tedrîs-i fünûna mülâzemet ederek imâmet vazîfesini bi-hakkın ifâ etdi. Muahharan üstâzının irtihâlinde şeyhülkurrâ olduğu halde 1129 senesi rebîülevvelinin on yedisinde dâr-ı naîme irtihâl etdi. Âlim, kâmil, mukrî savt ü edâsı güzel bir zât idi. Mahdûmu Hâfız Mustafa Efendi’dir.