Amasyalıdır. Kibâr-ı züamâdan Amasya Alaybeyi Kâdızâde Hasan Bey bin Mehmed Çelebi mahdûmudur. Pederinin irtihâlinde nâil-i zeâmet olup Abaza Paşa vak’asında Köprülü Mehmed Paşa tarafdârı olduğundan 1071’de Amasya Alaybeyi oldu

1072 şevvâlinde azl edilib 1073’de Rûmeli harbine gitdi. Fâzıl Ahmed Paşa’nın ma’iyyetinde ibrâz-ı liyakât ederek 1075’de yine Amasya Alaybeyi ve 1077’de ma’zûl oldu. Ba’dehû Kandiye harbine gidip 1080’de sâlisen Amasya Alaybeyi oldu.

Ba’delazl 1088’de râbian Amasya Alaybeyi olup 1090’da Bolu sancâğı beyi olduğu halde 1094’de Viyana harbine me’mûren hareket ve rebîülevvelde Belgrad sahrasında ordu-yı Hümâyûna vusûlünde bâ-rütbe-i mîr-i [82] mîrâni Uyvar Kal’ası muhâfızı oldu.

Kal’a-yı mezbûrenin muhâfazasında gösterdiği tedbîr ve şecâatine binâen sene-i mezbûre şevvâlinde Rumeli pâyesiyle Sivas beylerbeyi oldu. Viyana inhizâmında serdâr-ı Ekrem Kara Mustafa Paşa ile Belgrad’a avdet edib 1096 senesi saferinde Kastamonu beylerbeyi ve sânîyen Uyvar Kal’ası muhâfızı oldu.

1097 senesi muharreminde Şehr-i Zor ve 1098’de Rakka ve 1099’da Adana beylerbeyi ve 1100 senesi gurre-i muharreminde Amasya sancâğı mutasarrıfı ve Anadolu müfettişi oldu. 1101’de müfettişliği hitâma erib Amasya sancâğı uhdesinde kaldı.

1102’de Kayseriye mutasarrıfı Arab Polat Mehmed Paşa’nın mezâliminden dolayı i’dâmına me’mûr olup gitdi. Vazîfesini müdebbirâne ifâ eylediğinden 1103’de sânîyen Anadolu müfettişi olup Amasya sancâğı yine uhdesinde kaldı.

1104 senesi ramazânında merîzan Amasya’ya geldikde İstanbul’a haber-i vefâtı işâa edilib şevvâlinde Amasya [83] sancağına diğeri tayin edildiyse de bu haberin kizb-i sarîh olduğu arz edilmekle zilka’desinde Amasya sancâğı uhdesinde ibkâ edildi.

1105 senesi saferinin gurresinde Rakka beylerbeyi olup 1107 senesi rebîülevvelinde uhdesine rütbe-i vezâret ihsân buyuruldu. Fakat sene-i mezbûre zilhiccesinde dâr-ı bekâya rihlet etdi. Âkil, idâre-i vilâyete kâdir, şeci’, müdebbir idi.

Mahdûmları dergâh-ı âlî kapıcıbaşılarından el-Hâc Hasan, Mehmed Beylerdir. Kethüdâsı Gâzi Mehmed Ağa ve hazinedârı el-Hâc Yûsuf Ağa ve silahdârı şüc’ândan el-Hâc Ali Ağa’dır.