Amasyalıdır. Esbak Amasya mütesellimi Kiraz Mehmed Ağa’nın mahdûmudur. Amasyalı Bayburdlu oğlu Kara İbrâhim Paşa’nın kethüdâlığında dâiresine intisâb edib vezâretinde ağalarından oldu. 1094’de Kozbekci olarak Bostaniyân-ı Enderûn [84] ocağına girdi.
1095 muharreminde Efendisinin sadâretinde nâil-i imtiyâz olup sene-i mezbûre şa’bânının yirmi birinde Bostancılar kethüdâsı ve 1097 senesi muharremi evâhirinde bostancıbaşı, ya’nî zabdiye nâzırı oldu.
Bu me’mûriyetinde Sultân Mehmed-i Râbi’in teveccühât-ı mahsûsâsını kazandığından kâ’im-makâm-ı sadr-ı âlî Receb Paşa’nın istirkâbına uğradı. 1098 senesi şa’banının yirmi yedinci günü Receb Paşa’nın arzıyla azl edilib kapıcıbaşılıkla taşraya gönderildi.
1103’de Merzifonî Hacı Ali Paşa’nın sadâretinde cebecibaşı olup 1104’de müşârün-ileyhin sadâretden infisâli üzerine azl edilerek Amasya’ya i’zâm edildi. Vusûlünü müteâkib Hüseyin ve Firûz Ağalar’ın evkâfı tevliyeti verildi.
1105’de Hicâz’a gidip 1106’da avdet etdi. 1107 senesi evâilinde Diyârbekir vâlîsinin emvâl ve emlâkini kabza me’mûren gidip avdetde sene-i mezbûre recebinin [85] yirmi üçüncü günü vefât etdi. Müdebbir, işgüzâr ise de tâlihi yokdu. Mahdûmları Mehmed, Ali, Hasan Ağalardır. Bunlara İnekcioğulları dendi. Hasan Ağa’nın evlâdından Mehmed Ağa bin Mehmed 1256’da kırkbeş yaşında mahdûmu Ahmed Ağa ile ber-hayat idi.