Amasyalıdır. Eski Kethüdâ Mahallesi eşrâfından esbak Amasya nâibi el-Hâc Mehmed Efendi’nin mahdûmudur. Tahsîl-i ma’âriften sonra İstanbul’a gidip Bâb-ı âlîde kethüdâ kalemine girdi. Hatîbzâde Yahyâ Paşa’nın sadâret kethüdâlığında dâ’iresine erip vezâretinde kâtib-i dîvânı oldu.
Müşârün-ileyhin ma’iyyetinde devr-i bilâd edib 1168’de vefâtı üzerine İstanbul’a gelip 1171’de kethüdâ kâtibi ba’dehû mektubî-i sadr-ı âlî oldu. 1182’de Ruslar’a i’lân-ı harb edildiğini müte’âkib Bender ordusu defterdârı olarak orduya gitdi. Orada vefât etdi. Şâ’ir, edîb, hoş-lehçe bir zât olup erbâb-ı ma’âriften idi.