[116] Amasyalıdır. Hâcegân-ı dîvân-ı hümâyûndan Amasyalı Nüzhet Ömer Efendi’nin mahdûmudur. Pederi Amasya’da Sultân Bâyezîd evkâfı mütevellîsi iken doğdu.
Bâb-ı âlîde mektûbî-i sadâret kalemine girip tahsîl ü terbiyye gördü. Tefeyyüz ederek ser-halîfe olup sonra bâ-rütbe-i hâcegânî devr-i menâsıb etdi. 1221’de mektûbî-i sadâret iken Îrân’a sefâretle gönderildi. Orada îfâ-yı vazîfe-i sefâret edib 1222’de avdet etdi.
1224 senesinde vefât eden meşâhîr-i zalemeden Filibe a’yânı Rüstem Ağa’nın malını kabz u müsâdereye me’mûren Filibe’ye gitdi. Oraya vusûlünde mûmâ-ileyhin bütün emvâl ü emlâkini kabz ü irsâl etdiği hâlde kendisi de orada receb ayında vefât etdi. Ma’ârif-perver, [117] kâtib, muktedir idi.
Mahdûmu vüzerâdan Abdurrahmân Nâfiz Paşa’dır. Bunun vâlidesini ricâlden Tekfûrdağlı Ahmed Ağa tezevvüc edib hânesinde büyüdüğünden Ahmed Ağa’nın oğlu zannedilmişdir. Nâfiz Paşa’nın vakfiyesinde es-Seyyid Mehmed Refî’ Efendi’nin oğlu olduğu mûsârrahdır.