Amasyalı Hâce Ahmed Paşa’nın kölesi olup dâ’iresinde terbiyye etdi. 1056 senesi muharreminde âzâd edib rebîülevvelinde a’yândan Hacı Efendizâde Sarı Mehmed Ağa’nın kerîmesi Havvâ Hânım ile evlendirdi. Müte’âkiben sipâhî olup onuncu bölüğe kayd edildi.
1062’de birinci ve 1066 muharreminde ikinci def’a Amasya kethüdâyeri ve saferinde Amasya mütesellimi olup 1067 muharreminde ma’zûl ve şa’bânında üçüncü def’a Amasya kethüdâyeri ve ba’dehû Amasya mütesellimi olup 1068 şa’bânında azl edildi.
Bu esnâda Sadr-ı a’zam Köprülü Mehmed Paşa’nın aleyhinde kıyâm eden Abaza Hasan Paşa’ya uyduğundan 1069 senesi cumadelâhiresinde Haleb’te ahz u i’dâm ve bütün emlâki müsâdere edildi. Mahdûmu Ahmed Çelebi ve bir kerîmesi köle ve câriye gibi Sivas vâlîsi Sührâb Mehmed Paşa’ya satıldı. Sadr-ı esbak Sührâblı Ahmed Paşa işte bu Ahmed Çelebi’dir. Bunun yüzünden Efendisi Hâce Ahmed Paşa da müsâdere edilmişdi. [109]