Amasyalıdır. Amasya mahkemesi kâtibi Gümüşlü el-Hâc Mehmed Efendi’nin mahdûmu ve fuzalâ-yı mevâlîden el-Hâc İsmâ’îl Efendi’nin birâderidir. Evâ’il-i hâlinde yeniçeri olup Amasya’da yeniçeri yazıcısı oldu. Ba’dehû İstanbul’a gidip yeniçeri ocağında orta yazıcılardan oldu.
1178 târîhli Yeniçeri Defteri’nde “Sa’îd Mehmed bin Mehmed Amasya, yazıcı” ve [264] 1182 târîhli Yeniçeri Defteri’nde “Yazıcı Sa’îd Mehmed bin el-Hâc Mehmed Amasya” ve 1190 târîhli Yeniçeri Dîvân Defteri’nde “Dergâh-ı âlî yeniçerileri ocağında Kâtibzâde Sa’îd Mehmed Yazıcı” diye yazılı görüldü.
Bu sûretle terakkî ederek üç def’a baş yazıcı olup kul kethüdâlığına mu’âdil bir makâma geldi. Gümüşlü Müftüzâde el-Hâc Ahmed Efendi’nin Şeyhülislâm olduğu esnâda başyazıcılıktan Sekbânbaşı olup 1206 senesi zilka’desinde yeniçeri ağası oldu.
Çünkü yeni sadr-ı a’zam olan Melek Mehmed Paşa, harb ü darb erbâbından bahâdır bir zât olan Yeniçeri Ağası Arabzâde Ahmed Ağa’yı istirkâb eylediğinden azliyle leyyinü’l-cânib ve mümtezic olan mûmâ-ileyh Sa’îd Ağa’yı zilka’denin evâ’ilinde yeniçeri ağalığına getirmişdi.
Ancak Yeniçeri ocağının ıslâhına ve yeniçerilerin ta’lîm u tanzîmine i’tinâ ve ihtimâm edildiği esnâda yazıcılıktan yetişme bir zâtın bu emr-i azîmi deruhde edemeyeceği mu’ahharan anlaşılmağla 1207 senesi muharreminin evâhirinde azl ve tekâ’üde [265] sevk edildiğinden az sonra vefât etdi.