Amasyalıdır. “Emir Müderris” demekle meşhûr olup 1178’de vefât eden es-Seyyid el-Hâc Ahmed Efendi bin es-Seyyid el-Hâc Hâfız Mehmed Efendi bin Ya’kûb’un mahdûmudur. Amasya’da pederinden ve en ziyâde Iydîzâde el-Hâc Âkif Mustafa Efendi’den tahsîl-i ulûm edib ders-i âm oldu. [263]
Sonra İstanbul’a gidip rü’ûs imtihânına girdi. Parlak bir sûrette kazanıp Fâtih Sultân Mehmed Hân Câmi-i şerîfinde ders-i âm ve 1165’de müderris oldu. Esnâ-yı tedrîsinde medâris-i mu’tâdeyi devr ederek 1191’de Dârü’l-hadîs-i Süleymaniyye müderrisliğinden Kudüs mollası oldu.
Bir senelik müddet-i örfiyyesini ikmâl etdikten sonra tedrîsâtına devâm edib 1197 senesi gurre-i muharreminde Mekke-i Mükerreme mollası olarak Hicâz’a gitdi. Orada bir yıl hükûmet-i şer’iyye vezâ’ifini îfâ ederek avdet edib 1201’de dâr-ı na’îme irtihâl etdi. Meşâhîr-i ulemâdan fâzıl, kâmil bir zât-ı sütûde-simât idi. Birâderi es-Seyyid Abdürrahîm Efendi’dir.