Amasya mülhâkatından Gümüş kazâsına tâbi’ Düğüncü karyesinden Hasan’ın oğludur. Gençliğinde enderûn-ı hümâyûna girip seferli odasında ta’lîm u terbiyye gördü. Tedrîcen tefeyyüz ederek kilâr kethüdâsı ve 1057 ramazânında vefât eden Tavukçubaşı Hasan Ağa’nın yerine Tavukçubaşı oldu.
1062’de Galata sarâyı ağası ve 1067 muharreminde Köprülü Mehmed Paşa’nın arz u inhâsıyla has odabaşı oldu. Çünkü Köprülü Paşa, bunun vâsıtasıyla enderûn ağalarının ahvâl ü etvârına muttali’ olarak basîretkârâne hareket etmek istemişdi. Fakat Kara Hasanzâde Hüseyin Ağa’nın sadr-ı müşarün-ileyhi azl etdirmek teşebbüsâtında mümâşâtı ve mu’ahharan Abaza Hasan Paşa’nın isyânı mes’elesinde ba’zı harekâtı Köprülü Paşa’yı şübhelenderdiğinden bahak illetine mübtelâ olduğu bahânesiyle 1069 senesi evâ’ilinde tekâ’üde sevk edilerek enderûndan ihrâc edildi. [290]
Bu keyfiyyet kendisine pek ziyâde te’sîr etdiğinden hüzn ü elem içinde altı ay sonra vefât etdi. Mahdûmları Ahmed, Mahmûd Ağalardır. Mahmûd Ağa, a’yân-ı ricâlden olup “Mahmûd Çavuş” demekle meşhûr olduğundan evlâdına “Çavuşzâdeler” dendi.
Mahmûd Çavuş’un mahdûmu kibâr-ı müderrisînden İbrâhim Efendi’dir. Bunun oğulları kudâtdan Sun’ullâh, Feyzullâh Efendilerdir. Feyzullâh Efendizâde sudûr-ı ilmiyyeden Şemseddîn Ahmed Efendi “Çavuşzâde” demekle pek meşhûr idi.
Ahmed Ağa, kethüdâ-yı sadr-ı âlî olup tercemesi yukarıda yazıldı. Mahdûmları Mustafa, Mehmed Efendilerle Abdullatîf, Rahmetullâh, Hasan, Hüseyin Ağalardır. İki evvelkiler İstanbul’da ve dört sonrakiler Tokat’da kaldılar. Bunların evlâdı Tokat’da el-yevm vardır.